Para sa mga pilipino

by Mayari

Namamaos na lalamunan sa kahihiyaw

Namumugtong mga mata sa kahihikbi

Gaano karaming tinig ba ang kailangan para kayo’y makinig?

Libo-libong Pilipino na ang nananakawan ng buhay

Kasabay ng pandemyang lumalala kada patak ng oras

Subalit ang hain ninyong plano’y sumusulong pa rin paatras

Sa halip na magligtas ay kumikitil pa gamit ang dahas

Lugmok sa kahirapan ngunit nagagawa niyo pang magwaldas

At sa mga pakiusap, sagot ninyo’y pulos walang kahiyaan

Nasaan ang mga pangako bago kayo maluklok sa upuan?

Nasaan ang inyong puso para sa inyong nasasakupan?

Namamaos na lalamunan sa kahihiyaw

Namumugtong mga mata sa kahihikbi

Minsan pakiramdam ko mas maigi nang huminto

Ang pumikit at tumalikod sa pighating nasa harap ko

Sapagkat sino bang makaririnig sa kakarampot kong tinig?

Saan ba makararating ang napakaraming hinaing?

Subalit

Ang laban nga palang ito’y hindi lamang para sa akin;

Sa likod ng bawat sigaw ay gabundok na layunin—

Hustisya.

Para sa bawat buhay na kinitil,

Para sa bawat paghingi ng tulong

na sinagot ng mga uldog ng kulong,

habang ang mga tunay na kriminal ay naghahari-harian;

Plano.

Epektibong plano bukod sa paghihintay ng bakuna,

Estratehiya para sa ikabubuti ng mga manggagawa,

Ayuda para sa mga walang-wala na;

Pagtupad sa mga pangako,

At higit sa lahat,

Puso para sa mga Pilipino.